INFURMAZIUN
Servetschs ambulants
Chasa da terapia Fürstenwald
Infurmaziun per clients
Nus ans legrain che Vus As interessais per nossa purschida terapeutica. Cun questa broschura vulain nus dar a Vus ina curta e simpla survista da noss servetschs. La broschura orientescha Vus davart ils pli impurtants aspects da nossa lavur. Per ulteriuras dumondas e per annunzias stat noss secretariat a Vossa disposiziun.
Nus As engraziain gia ordavant per la fidanza demussada.
Nus essan
Fundaziun
La fundaziun privata "Fundaziun da psichiatria d’uffants e giuvenils en il Grischun" è la purtadra dal servetsch da psichiatria d’uffants e giuvenils en il Grischun. Quel cumpiglia dus secturs da servetschs.
Servetschs ambulants
En il servetsch ambulant stattan a Vossa disposiziun la sedia principala a Cuira ed ils posts regiunals a Tavau, Glion, Tusaun, Roveredo e Samedan. Ultra da quai offrin nus era uras da consultaziun a Scuol e Samedan.
Servetschs staziunars
La chasa da terapia Fürstenwald è responsabla per il tractament staziunar e parzialmain staziunar d’uffants che van anc a scola.
Nus vulain
Prevenziun
Nossa finamira è d’eruir e da tractar baud las malsognas psichicas d’uffants e giuvenils per impedir ch’ellas cumparian puspè en in’autra fasa da la vita.
Quai ans stat a cor
Etica
Nus essan suttaposts a las obligaziuns etic-professiunalas da la Societad svizra da medis e da las Federaziuns psicoterapeuticas svizras e nus resguardain particularmain ils dretgs dals pazients e la discreziun medicala.
Autoguariziun
Ils individis, las famiglias e las gruppas disponan da las forzas necessarias per superar difficultads. Nossa lavur vul mussar a las persunas co far diever da questas resursas.
Qualitad
Nus ans sentin obligads da porscher la meglra qualitad da psicoterapia pussaivla. Nossas medias e noss medis, noss psichiaters e nossas psichiatras disponan d’in studi terminà, d’ina scolaziun speziala da psicoterapia, d’in vast spectrum d’experientscha e da cumpetenza.
Nus lavurain
Clientella
Nus partin da l’idea che l’entira famiglia saja pertutgada, sche uffants e giuvenils han difficultads. Nus empruvain da chapir nossa clientella partind da lur ambient social. Mintga persuna che pudess gidar a schliar ils problems, envidain nus perquai da far part als process da terapia. Ensemen cun ellas ans cunvegnin nus davart il procediment e la finamira dal tractament.
Consultaziuns
Noss servetschs consiliars e nossa purschida da supervisiun stat a disposiziun a clinicas, instituziuns ed auters servetschs.
Servetschs ambulants
Las consultaziuns vegnan fixadas ensemen cun la pazienta/il pazient ed han lieu en ils ambulatoris regiunals.
Offerta:
Psicoterapia cun uffants, giuvenils, geniturs e famiglias
Terapia da pèrs
Terapia da gruppa
Intervenziuns en cas da crisa
Servetschs consiliars
Accumpagnament en cas da separaziun/divorzi
Diagnostica psicologica
Expertisas
Supervisiun
Mediaziun
Nus tractain:
Temas, depressiuns, problems da contact, agressivitad, disturbis da mangiar, disturbis da la sien, difficultads da concentraziun, problems cun relaziuns, disturbis da la prestaziun, crisas d’adolescenza, tut ils sintoms da malsognas psichicas sco disturbis da socialisaziun, psicosas, disturbis dal svilup da la persunalitad, malsognas psicosomaticas, disturbis emoziunals.
Sclerir l’incumbensa
Sche las persunas pertutgadas èn d’accord e prontas da sa participar, entrain nus era en contact cun auters gidanters sco p.ex. medis, scolasts, terapeuts, pedagogs, differents servetschs e diversas instituziuns.
Sche nus essan da l’opiniun che la terapia ambulanta na portia betg resultats cuntentaivels, avain nus la pussaivladad d’enviar la persuna interessada a la chasa da terapia Fürstenwald.
Chasa da terapia Fürstenwald
Admissiun
Admess èn uffants en la vegliadetgna da scola cun problems psichics, sco disturbis dal cumportament, difficultads d’educaziun a chasa, en scola ed en il temp liber. Las persunas pon entrar e sortir da la terapia durant l’entir onn.
Annunzia
L’annunzia succeda sur il servetsch ambulant a Cuira. En sedutas preliminaras examinain nus l’indicaziun per ina terapia staziunara u parzialmain staziunara. Discurs d’infurmaziun e dis d’emprova en la chasa da terapia èn ulteriurs pass fin a l’admissiun.
Finamira
Cun agid da tractaments psichiatrics e psicologics per uffants, ina tgira sociopedagogica ed in sustegn pedagogic curativ vulain nus schliar u facilitar ils problems dals uffants. Per il temp gist suenter l’extrada da la chasa da terapia è previs in accumpagnament entras in servetsch ambulant.
Gruppa staziunara
La gruppa staziunara en la chasa da terapia porscha 7 plazs per uffants. En l’internat survegnan ils uffants da glindesdi fin venderdi in’assistenza cumpletta (24 uras). Las fins d’emna, ils firads e durant las vacanzas resta la chasa da terapia serrada.
Clinica dal di
En la clinica dal di cun 14 plazs, repartids en duas gruppas, s’occupan educaturs ed educaturas dals uffants davent da las 08.00 fin las 16.30.
Scola
La scola da terapia è ina scola speziala cun 3 classas da l’emprim fin il novavel onn da scola. Ella s’orientescha al plan d’instrucziun dal chantun Grischun. La finamira è la reintegraziun dals scolars en las scolas publicas.
Terapia
Il champ terapeutic s’occupa da la diagnostica medicinala e psicologica e da la terapia individuala e da famiglia.
Finanzas
Noss servetschs mettain nus a quint tenor las tariffas da las cassas da malsauns resp. da l’Assicuranza d’invaliditad.
Regionalstelle Samedan (Fiala)
Egeler Winfried, Fachpsychologe für Psychotherapie FSP
Codoni Jean-Claude, Psychologe FSP
Spital Oberengadin
7503 Samedan
Telefon: 081 850 03 71 / Fax: 081 850 03 72
Regionalstelle Surselva (Fiala)
Felix Boehringer, Psychotherapeut HAB/BVP
Spitalstrasse 4
7130 Ilanz
Telefon: 081 925 24 23
Weiterführende Informationen erhalten Sie auf unseren deutschsprachigen Seiten - Danke.
Wir danken der Lia Rumantscha für die Übersetzung.